БНХАУ-тай сайн хөршийн найрсаг харилцаа, хамтын ажиллагааг тогтвортой хөгжүүлэх нь манай гадаад бодлогын тэргүүлэх чиглэлийн нэг билээ. Монгол Улс, БНХАУ-ын хоорондын дипломат харилцаа 57 жилийн түүхтэй.
Хоёр талын хамтын хүч чармайлтаар сүүлийн жилүүдэд сайн хөршийн харилцан итгэсэн түншлэлийн харилцаа бүх салбарт өргөжин хөгжиж, хөрш ард түмний найрамдал, харилцан ойлголцол улам гүнзгийрсээр байна. Эдийн засгийн хамтын ажиллагаа үлэмж өргөжиж харилцаа холбоо, зам тээвэр, түлш эрчим хүч, аялал жуулчлал зэрэг салбарт шинээр хөгжиж эхлэв. Хоёр орны иргэд харилцан зорчих нь мөн нэмэгдсээр байна. Үүнтэй холбогдуулан Монгол Улсаас БНХАУ-д суугаа ЭСЯ нь өөрийн иргэд, татвар төлөгчдийг үнэн бодит мэдээ, мэдээллээр хангахад чухалчлан анхаарч байгаа болно. Энэ ажлын хүрээнд шинээр нээж буй энэхүү вэб хуудас нь уншигчдад өнөөгийн Монгол-Хятадын харилцаа, БНХАУ-ын талаар товч танилцуулахаас гадна Хятад улсад зорчих, суралцахтай холбогдох зарим үндсэн мэдээ, мэдээлэл өгнө.
    Мөн БНХАУ-ын төр, Засгийн байгууллагууд болон аж ахуй, үйлдвэр, худалдааны байгууллагуудын шууд вэб хуудасны холбоос тавигдсан болно.
Монгол-Хятадын харилцаа болон энэхүү вэб хуудасны агуулга, мэдээ, мэдээллийн талаарх санал, бодол, зөвлөмж зөвлөгөөгөө бидэнтэй хуваалцахыг урьж байна.
    Үнэт цагаа зарцуулан манай вэб хуудсанд зочилсон эрхэм Танд гүн талархлаа илэрхийлье.

Галсангийн Батсүх